Instituti i Edukimit, Trashëgimisë dhe Turizmit (IETT) organizoi promovimin e librit “Elegji për Ballkën”, me autor Prof. Xhevair Lleshi, në një mbrëmje letrare që mblodhi dashamirës të librit, miq dhe të ftuar. Në hapje, znj. Anisa Hykaj paraqiti një analizë të veprës, duke vlerësuar mënyrën se si autori, përmes kujtimeve dhe eseve, ndërton portretin e Ballkës si një figurë që mishëron urtësinë, fisnikërinë dhe vlerat njerëzore. Ajo theksoi se libri përcjell mesazhin se kujtesa dhe mirënjohja janë mënyra më e bukur për të ruajtur gjallë vlerat dhe njerëzit që lënë gjurmë në jetën e të tjerëve. Më pas, Prof. Xhevair Lleshi foli për frymëzimin, procesin e krijimit të librit dhe mesazhin që ai synon t’i përcjellë lexuesit, ndërsa z. Ilir Hoxha ndau disa kujtime personale për nënën e tij, të cilat ndihmuan të kuptohej më mirë figura që frymëzoi autorin në shkrimin e kësaj vepre. Në përfundim, të pranishmit ndanë përshtypjet dhe reflektimet e tyre mbi librin, duke e kthyer mbrëmjen në një bisedë të ngrohtë mbi kujtesën, vlerat njerëzore dhe fuqinë e letërsisë.
